بكل حُب .. تحضيري جامعة طيبة بين يدينكم ❤

السلام عليكم ورحمة الله وبركاته لكل القلوب الطيّبة الي بتقرأ حروفي المتواضعة العاميّة ️❤❤

طالبات وطُلاب طيبة الطيبّة أهنيكم من أعماقي بالقبول .. أصطفاكم الله عشان تخوضوا " السنة التحضيريّة".. أو زي ما يستشعرها قلبي .. "التحضيري العظيم" ودا أكبر دافع خلّى حروفي ولأول مرا تكون بين يدينكم فدي المدونة.

حبدأ معاكم خطوة خطوة وحبّين الشي الحلو وكمان الوِحش !

الأغلاط الي لازم تتجنبوها عشان تصيروا أحسن وتتنوّروا أكتر وتحققوا أهدافكم ! 

حتقرأوا الواقع بإذن الله وتحسّوا فيه..
تحتاجوا تصفّوا ذهنكم وأنتوا بتقرأوا دي المدونة ؟
جهّزوا كوب القهوة أو أي مشروب تفضّلوه .. أقعدوا فمكان هاديء .. أطلقوا خيالكم لبعيد .. وأعقدوا من جوّتكم  الخير وأنتوا بتغرقوا فدي الحروف .. 

 ********************

فيوم ١٦ شهر ٨ سنة ١٤٣٧هـ !

كانت آخر صورة نصوّرها لمبنانا العظيم..

أتحررت قيودنا من التحضيري فدا اليوم ! 

مافي إختبار!

مافي مذاكرة وسهر وكل داك التعب  !

خلّصنا تحضيري وإحنا لسّا بنفتكر أنو قريب أنقبلنا .. 

عدّت الأيام بسرعة ، لكن السؤال الي محيّرنا ، أحنا إيش قدمنا وبإيش حنطلع فالنهاية؟

كمّلنا وطلعت نتايجنا وتخصصاتنا وكتير رضي وكتير سخط على الجامعة والقسم ، لكن فكل حال عدّينا وسار التحضيري ذكرى .. فقبل كل شي وقبل ما تخشوا فتفاصيل التحضيري ، لازم لازم تحطوا خطة أ وخطة ب وكمان خطة ج !

ودي الخُطط حتكون بالنسبة لإختيار التخصص ، صحيح تركّزوا بكل مافيكم أنكم تجيبوا أول رغبة أخترتوها لكن لو قدّر ربي وما جات !

حتوقف الحياة يعني ؟ .. مستحيل!

فعشان كدا كونوا مهيأين نفسيتكم لدا الشي وأقرأوا عن كل التخصصات ولا تظلموا إي تخصص عشان بس سمعتوا عنو كلام وِحش، أعطوا كل تخصص حقو!

لأنو فالتحضيري مر علينا كتير سحبوا من الجامعة وبدأوا من جديد فمكان تاني أو حتى إنهم عادوا التحضيري عشان بس ما أنقبلوا فأول رغبة، وكتير كتير يسحبوا من التحضيري فربع المشوار بسبب أنهم خايفين من الفشل أو عشان ما يدخلوا التخصص الي يبغوه ..!

ما بحبّطكم بالعكس لكن حلو الواحد يكون على دراية بكل شي ومهيء نفسو كويس عشان مشاعرو وعشان لايوقف كل شي فعينو ويحسّب أنو ما أنجز ولا عمل شي يستحق بس عشان ما دخل طب أو أي تخصص يبغاه!

      ********************

فبداية كل شي .. السنة التحضيريّة أبداً مهي سنة عادية على أي أحد ينقبل فيها ، ما نقول من صعوبتها ؟

 لاء بالعكس .. 

نقول من الحاجات الي حتمر عليكم وتغيّركم وتقويّكم، روتين الحياة الجديد كطُلاب جامعيين ، الناس الي حوليكم، شكل المباني والنظام والدكاترة والكافيهات وكل شي بالمعنى الحرفي! 

عشان كدا دوركم أعزائي الي بتقرأوا دي المدونة تفتّحوا عقولكم كويس وكمان قلبوكم عشان تخلّوها تستشعر أبسط الأشياء وتحرككم ، عشان تكونوا أحسن وتنجزوا وتكمّلوا ، عشان تعب الـ ١٢سنة والقدرات والتحصيلي وكل دي الحاجات الي عدّيتوا منها وحمدتوا ربّنا أنو خلاص أنتهت دي المرحلة الصعبة والمليانة بالضغط النفسي ، فعشان خاطر كل شي حاولوا قد ما تقدروا ما تضيّعوا ولانقطة صغيرة من أيام التحضيري.. 

أتمنى أنكم تقروا دي الحروف بقلوبكم ..

يمكن دحين ما تستوعبوا كل حاجة  لكن لمن حتبدأوا دراسة حتكونوا إن شاء الله عارفين كويس تفاصيل كلامي وإيش أنابقصد !

طيب يلا حنبدأ .. 

        ********************

#نبذة سريعة عن السنة التحضيرية؟

طبعاً هيا سنة وحدة بس فيها ترمين وكل ترم حتدرسوا إن شاءالله ٥ مواد .. مادتين علمية وطبعاً تكون باللغة الأنجليزية كُتب وعروض وأسئلة أختبار لكن الشرح كانوا يشرحوا عربي مع إستخدام مصطلحات إنجليزية كتيرة.. ومادتين عامة باللغة العربية .. ومادة الأنجليزي .

مافي فالسنة التحضيريّة إي سكراب أو لاب كوت لبس الجامعة المعتاد بالنسبة للبنات والأولاد ..

وطبعاً نسبة التسكين الي حتتخصصوا فيها إن شاءالله فالنهاية بتكون على أساس

٣٠٪‏ من الموزونة الثلاثية و٧٠٪‏ من معدل الجامعة الي حتحصدوه. 

        ********************

#التخصصات مابعد التحضيري:

طبعاً السنة التحضيريّة بتجمع مابين التخصصات الطبيّة والعلميّة فنفس الوقت..

- الطب البشري 

-التغذية العلاجية

-المختبرات الطبيّة

-طب وجراحة الأسنان

-التمريض

- العلاج الطبيعي (أولاد فقط)

-الصيدلة

- الأشعة التشخيصيّة(أولاد فقط)

-العلاج التنفّسي(أولاد فقط)

-الأطراف الصناعيّة والأجهزة المساعدة(أولا فقط)

-الجولوجيا(أولاد فقط)

-الحاسب الآلي

-الهندسة(أولاد فقط)

-أحياء 

-كيمياء

-فيزياء

-رياضيات

        ********************

# النصايح والحاجات الي لازم نتجنّبها وكمان الحاجات الي لازم نقوّيها عشان نصير أحسن فالسنة التحضيريّة؟

١- اللغة :

أهم شي وكل شي ومربط الفرس للسنة التحضيرية هيا " اللـــــغة" .. ليش؟ 

عشان المواد العلمية بتكون باللغة الأنجليزية والإختبارات بيلعبوا فاللغة كتير بشكل ما تتصوره فأنتوا كونوا أذكى وأشطر منهم وأكسبوا إنقليزية كويسة عشان بعدين كمان فالتخصص ما تتعبوا بإذن الله، فيعني لو حاسين بضُعف فاللغة ؟

 لسّا عندكم فرصة تقدروا تحسّنوها فالإجازة وتكونوا ضامنين نفسكم بإذن الله.

٢- الوقت :

سبب النجاح والتوفيق بأفضل النتايج فالسنة التحضيرية بعد الله هوا "الوقت" 

لأنو الدوام حيكون من ٨ لـ٣ وفيه طُلاب لـ٤ وممكن أطول بريك حيكون نص ساعة بس ؟ 

والباقي كلو محاضرات ، وأكيد بين المحاضرات بريك ١٠ دقايق بس .. فالشاهد فالموضوع أنو لازم تبدأوا تتعودوا على الوقت المُنظّم من الإجازة عشان يسير عندكم عادة و تقدروا توفقوا بين الراحة والدراسة و لو أتنظم وقتكم كويس ممكن تخصصوا جزء من يومكم تمارسوا فيه هواياتكم أو حاجات تحبوها.. ممكن تعملوا جداول ورقية بسيطة على مكتبكم تحطوها أو مثلاً تطبيقات فالأجهزة تذكّركم !

وعشان منجد تكونوا أنجزتوا ومافي شي ضاع عليكم ومشاعركم تكون كويسة وما تحسوا أنكم مضغوطين وفنفس الوقت عشان تقدروا تعطوا كل شي حقو وواجبو وأهم دي الحقوق "الدراسة".

٣- الغياب والحضور:

طبعاً لو أقولكم أنو كانوا فيه طُلاب مرا شاطرين لكن بسبب كترة غيابهم وماكانوا يسألوا كم باقيلهم أيام باقية أخدوا حرمان فالمادة !!

فمرا مرا حافظواعلى غياباتكم ولاتغيبوا إلا فالشي الضروري ، أما الخرجة مع الأصحاب وقت المحاضرة وكل دي الحاجات الي بنشوفها صدوقني محا تجيب فايدة وحيجي وقت الإختبار تقعدوا تتحسّروا أنكم غبتوا بدون لزمة ومافهمتوا المحاضرات، وعن تجربة يعني... كنت أحاول ما أغيب فالمواد العلمية بالذات .. عشان منجد لو فاتت معلومة صعب أحد يوصلّكم هيا زي دكاترتكم وفوقتها تقعدوا تترزلوا على الخلق .. فهموني فهموني؟ 

أختصروا على نفسكم ولا "تغيبوا" إلا فالضرورة بسسس، ولو حصل ؟

روحوا لدكاتركم فالساعات المكتبية وأسألوهم عن أهم النقاط الي أخذوها فالمحاضرة وأسألوا أصحابكم برضو وإن شاءالله حيمشي الوضع. 

أما الحضور؟

فنص الفهم وأصل كل شي ، حاولوا تغيّروا من نفسكم شويا من ناحية المحاضرة وتستعدولها بحُب و روح حلوة أفهموها كويس وأقعدوا قدام ، إيوه عادي كونوا "مُصطفى" .. وأسألوا عن كل شي ولا تستحوا أبداً من شي لأنكم أنتوا المُستفيدين. 

٤- الأنشطة:

 حتنطلب منكم أنشطة و حاجات إضافية الي واجبكم تسوّوها عشان تفهموا المواد كويس،  وعشان كمان تحصيل المعدل.. حكتبلكم هيا رؤس أقلام ورح يجي شرحها إن شاءالله مع كل مادة :

•الأنشطة الي عليها درجات:-

*نشاط عام للسنة التحضيرية : 

ودا بيكون على مدار الترم عليه تقريباً ٥ درجات لكل مادة  .. تحضروا فيها أنشطة متعلقة بالمواد الي تاخدوها وأنشطة تتكلم عن مواضيع عامة .

*نشاط مثل شرح درس أو ملف أعمال لمادة الدراسات الإسلامية.

*نشاط مثل شرح درس أو حاجة بسيطة  لمادة اللغة العربية.

* فعّالية وعرض لمادة المهارات الجامعيّة.

*بحث وعرض في مادة الحاسب الآلي.

*تمارين الإلكترونية بمادة الأنجليزي.

*تمارين إلكترونية بمادة الحاسب.

•الأنشطة الإضافية المهمة:-

*الأسسمنت لجميع المواد العلميّة.

*موقع زُهري للرياضيات.

*الإختبارات التجريبيّة في مادة الحاسب الآلي.

*قناة اليوتيوب لشرح ومراجعة وحدات المواد العلميّة.

٥- التهيئة النفسية والجسدية للدراسة:

عشان تمشوا صح وتكمّلوا للنهاية بإذن الله ، لازم تبدأوا من نفسكم ، من أرواحكم!

تعقدوا النيّة وتتوكلوا  على الله ، تجهّزوا نفسيتكم ، تجهزوا المكان المناسب للدراسة، تحطوا عبارات تحفيزيّة فكل مكان !

عشان دا الشي بيفرق كتير وبيدخّل البهجة على الروح وبيخلّي الشعور أفضل.

لازم تخلّوا بالكم من صحتكم كويس عشان لا يصير فيه تعثّر فالمواد لا قدر الله ، وبالنسبة للبنات بيصير تقلّب فجو المبنى مرا زي التلج ومرا زي النار فجهزوا يا بنات بلوفرات خفيفة فشنطكم عشان حتى لو برّد الجو ماتمرضوا إن شاءالله .. وكمان لازم تهتموا فأكلكم ، وتناموا كتير وتتجنبوا السهر نهائياً عشان التركيز لليوم التاني ، وياريت كمان تخصصوا شويّة صغيرة من يومكم ولو نص ساعة بس للرياضة حتفرق معاكم وتتحسّن نفسيتكم.. وتفرغوا فيها ضغوطات كتير.. فدا جانب مرا مهم وكتير بيغفل عنو وبيحمّل نفسو أكتر من طاقتها وفالنهاية بيشوف أنو تعب ومو قادر يكمّل .. فطبيعي يسير كدا عشان وبكل بساطة ما أعطى كل شي حقو !

        ********************

#إيش هيّا المواد وكيف ممكن نذاكر بشكل صح  ! 

١- المواد:-

*اللغة عربية:

حتدرسوا فيها إن شاءالله الأساسيات الي أخدتوها فثنوي ومتوسط سهلة ولطيفة على القلب برضو حيكون فيها عروض بوربوينت مهمة جداً تلخّص الدرس فيعني الأحسن أنكم تتطلبوا العروض من قبل المحاضرة لا تجي..  وتبدوا تسجلوا ملاحظات الدرس مع الأساتذة وتراجعوا الكتاب وتحلوا التمارين الي فالكتاب أول بأول ..دا بالنسبة للإختبار القصير والدوري ، لكن النهائي حتنحذف دي الجزئية وتدخل معاكم جزئية جديدة فيها مقالات وسورة من القرآن وحاجات زي كدا يعني تحليل وأسئلة ، نثر وبلاغة.. لكن لا تخافوا أبداً جداً جداً سهلة ونفس الي فالكتاب حتجيكم نسخ لصق فأسئلة الإختبار فركزوا فكل كلمة مكتوبة فالكتاب وكمان الكلام الي بيقولوه الأساتذة.

ومذاكرتكم من الكتاب مافيها عروض دي الجزئية.. وحيكون عندكم زي النشاط متطلب للعربي عليه كم درجة شرح درس أو الي يطلبوه آساتذتكم برضو ما يتعب وسوا شغلكم أول بأول وخلّصوه بدري عشان لا تنضغطوا .. وبإذن ربّي فالكم الـ ٥ فالعربي.

*الدراسات الإسلامية:

مادة لطيفة على قد ماهيا دسمة لكن كل شي فيها حيكون مر عليكم فحياتكم الدراسية وشي من واقعكم .. تعتمد على الحفظ صحيح لكن قبل ما تفكروا تحفظوا شغّلوا خيالكم وأفهموا وأستوعبوا كل كلمة بتنقال عشان يسهل عليكم إن شاءالله .. ودكاترتها لطيفين جداً جداً وحيساعدوكم إن شاءالله فكل شي فلا تشيلوا هم على قد ما تسمعوا من كلام أسود وسلبي كملوا ولا عليكم .. طبعاً دي المادة برضو زي العربي حتكون فيه جزئية تاخدوها تختبروا فيها إختبار قصير ودوري بعدين تنحذف وتدخل جزئية جديدة فالنهائي فيعني الحمدلله رحمة من عند ربي .. وحيكون فيها عروض وكتاب ، بالنسبالي كنت أذاكر العروض وأعتبرها كافية ووافية ومرتبة جداً لأنو حقيقة الكتاب الكلام كلو على بعض فكان يشتتني..  

حاولوا كمان زي العربي تطلبوا العروض بدري من دكاترتكم عشان تجيبوها فالمحاضرة وتسجلوا ملاحظاتكم لو فيه شي مافهمتوه عشان يثبت.. ولاتنسوا تراجعوا الخرايط الذهنية الي حيعطوكم هيا بعد كل فصل،  عشان منجد ترتب كل المعلومات لأنو التعددات كتير مرا.. وكمان فدي المادة حيكون عندكم زي النشاط برضو شرح درس أو شي بسيط فبرضو أستعدوا بدري وأنجزوا شغلكم أول بأول والحمدالله كل شي مُيسر وسهل فكل الي عليكم أنكم تركّزوا ثم تركّزوا.. وإن شاءالله الـ ٥ تنتظركم فالدراسة الإسلامية.

*الحاسب :

مادة ولا أسهل منها وكلها أساسيات زي الورد والبوربوينت وغيرو مع شوية تفاصيل لو فهمتوها كويس حتساعدكم كيف تستفيدوا منجد من الحاسب فحياتكم ومشاغلكم على الجهاز ، وأساتذتها خلوقين مرا ويساعدوا كتير .. فطبعاً كل المحاضرات إن شاءالله حتكون فمعامل الحاسب وكل طالب له جهاز حاسب خاص فعشان كدا حتكونوا مع الأساتذة وهما يشرحوا فخلوكم معاهم خطوة بخطوة وركّزوا كويس كويس ، وأسألوهم لو شي أشكل عليكم وبالذات فوحدة الأكسل كونوا مرا مرا نبيهين عشان دي أكتر وحدة شويا تفاصيلها كتير ويجي منها فالإختبار النهائي كتير كتير.. لا تستهينوا فالحاسب أبداً لأنو لو أتراكم حتشوفوه صعب لكن هوا زي المويا فزاكروه أول بأول وطبقوا على أجهزتكم فالبيت بعد كل محاضرة عشان كمان العملي يسير سهل عليكم .. وبرضو فيه تدريبات تجريبية بعد كل وحدة على الجهاز فالمعمل لا تتساهلوا فيها ودايماً دايماً حلوها وأحفظوا أسألتها 

 لأنو أول شي زي كدا حتكون طريقة أسئلة الإختبار وغير كدا يجيبوا مرات نفس دي  أسئلة فالإختبار فمهمة مرا .. وفدي المادة حيطلبوا منكم زي البحث صغير تسوه كقروبات وحيعطوكم نموذج للبحث ومعلومات وبعد ما تخلّصوه حتعملوا عرض بسيط يشرح فكرتكم .. فبرضو أستعدولو كويس عشان منجد خسارة الدرجات تروح بسبب حاجات بسيطة .. وبإذن الله حتلاقوا نفسكم جبتوا ٥ فمادة الحاسب بكل سهولة.

*المهارات الجامعيّة:

طبعاً دي من المواد السهلة جداً وأعتقد مر عليكم زيها فالثنوي بس بشكل مُختلف ، مواضيع دي المادة كتير زي العمل الجماعي والبحوث العلمية وتقديم العرض الجيد وكتير مواضيع من واقع الحياة..فيها ملف إنجاز بسيط يتكون من أسئلة لكل وحدة فلا تشيلوا همو وأعملوه أول بأول عشان حرام الدرجات تروح بسببو .. وغير كدا فيه فعاليّة حيقولولكم عليها أساتذتكم إن شاءالله من فبداية الفصل .. فأستعدولها تمام وفكروا بفكرة جميلة ولمن تكونوا فريق عمل كونوا يد وحدة عشان لا تضيع درجاتكم وتكونوا فبر الأمان لأنو على آخر الأيام حيكون مرا مرا ضغط وإختبارات وكمان فعاليّة؟

فسوا كل شي بدري بدري عشان الوقت.

وبإذن الله مع مذاكرتكم الي أول بأول فالمادة الـ ه حتستناكم.

*الكيمياء + الفيزياء : 

من المواد العلمية الحبابة بصراحة والممتعة.. صحيح معلوماتها كتير لكن كل دا العلم أكيد أجرو فيه وبيرفعنا إن شاءالله درجات عند ربّ العباد.

عشان تكونوا تمام فالكيمياء والفيزياء .. لازم تحطوا فبالكم بعد كل محاضرة تاخدوها لازم :

١- تذاكروا الجزئية عشان كلو بيعتمد على بعض وفيه حفظ كتير بس طبعاً لازم فهم فبداية كل شي وتركيز.. وأسألوا عن كل شي لا تسمحوا للخجل يمنعكم عن المعلومات وبالعكس والله الدكاترة مرا يحبوا الناس الي تسأل كتير ويحترموا أنهم مخلصين ويبغوا يتعلموا ويتنوّروا .

٢- حيكون عندكم عروض للكيمياء وكمان للفيزياء لكل الوحدات دي العروض مهمة جداً وممكن تغنيكم عن الكتاب لكن الكتاب مهم فالتمارين وكمان المصطلحات الي فبداية كل وحدة.. وزي ما قلتلكم فوق اطبعوا العروض ولا من التاب معاكم فكل محاضرة مرا مهم وياريت تسجلوا ملاحظاتكم عليها أو تعملوا ملخص .

٣- طبعاً الملخص .. يُفضل كل طالب يلخص المحاضرة بنفسو ويكتب مع الدكتور ملاحظاتو عشان يفهم ويكون عارف كل شي.. ولمن تخلص المحاضرة يجمعها مع المحاضرات حسب الفصول ، حتحسوا أنو الفصل سار خفيف وسهل ومعلوماتو قليل ومدركّين كل شي ..

دي الملخصات وعن تجربة بعد الله فادتني كتير .. من الثنوي الحمدلله وأنا أعمل كدا فأي مادة أحسها دسمة ومعلوماتها كتير وفالنهاية بفضل ربي بحصد تعبي وبلاقي نتايج تفرّحني فمافي مانع نتعب شويا عشان نتعلم ونكون أحسن.

٤- موجودة قناة فاليوتيوب أسمها " السنة التحضيرية ، جامعة طيبة" .. حتلاقوا فيها مراجعات لمادة الكيمياء د.محمدين الله يسعدوا شارح كل الوحدات فدا من أكتر الأشياء الي كانت بتهوّن علينا وتحسسنا أنو منجد الحمدلله فاهمين وعلى فكرة د.محمدين دا تقريباً هوا المنسق تبع مادة الكيمياء فكل شي يقولو مهم جداً جداً وياريت تسجلوا الأمثلة الي بيقولها فالفيديوهات عشان تراجعوها لأنو بيجي كتير منها فالأختبار، ونفس الشي فالفيزياء كنا نعاني أنو الدكاترة مابيشرحوا فدا مو عذر وكنا ندخل  يوتيوب فيه دكاترة مرا كويسين يشرحوا الفيزياء الله يجزاهم كل خير..  والحمدلله كنا بنستفيد منهم كتير كتير.

 ٥- الكويزات الورقية  وبنك الأسئلة الي بيرسلوها الدكاترة وبعض التمارين مهمة كمان تقويكم على حل المعادلات وكمان فيها أسئلة تديكم فكرة عن طريقة الإختبار.

٦-الأسسمنت : 

ودا عبارة عن أسئلة كتير كمراجعة بعد كل محاضرة تحلوها مع دكاترتكم بجهاز يتسمّى " الأيكليكر" ، أتعب وأنا أقولكم مهمة دي الأسئلة ومرا مرا تثبّت المعلومات فالراس وكتير يتهاونوا فيها لكن حتعرفوا أهميتها لمن تخشوا الإختبار..  فيها معادلات تدربكم وحاجات كتير ، بعض الأسئلة تتوه شويا،  فأسألوا عليها دكاترتكم أو أتخطوها .. وخليكم على الباقي مركّزين ومو شرط تطبعوها يكفي بس من الجهاز تطلعوا عليها بعد كل محاضرة وقبل الإختبار.

وبإذن ربي لو عقدتوا نيتكم وسويتوا كل الي بقول عليه .. صدقوني بإذن ربي درجتكم محا تنزل عن الـ ٥.

*الأحياء :

و أغلب الي ناويين تخصصات صحيّة بإذن الله،  أنا عارفة أنو متحمسين لدي المادة كتير!

الأحياء مادة جداً جداً سهلة كانت الحمدلله معلوماتها أبداً مهي جديدة نفس معلومات الثنوي وكمان أقل ومختصرة ، لكن هيا الي تفرق اللغة وبس ، وصحيح فيها حفظ لكن نرجع ونقول حفظ بدون فهم ما كأنوا سوينا ولا أي شي .. فلازم نفهم ونركّز ومافي مانع نحفظ شويا عشان المعلومات تركز.

وعشان تنجزوا فيها لازم :

١- مذاكرة أول بأول زي ما شرحتلكم فوق فمادة الكيمياء والفيزياء، لأنو كلو بيرتبط ببعض والمخلصات برضو لأنو كتير حيندرج تحت بعضو وتعددات كتير فمرا كويس يكون عندكم ملخص كاتبينو بخط يدكم لكل وحدة .

٢- العروض مهمة كمان والكتاب الأتنين يكملوا بعض لا تركزوا على واحد وتهملوا التاني صحيح الكتاب كان مرا دش ، بس الحمدلله الدكاترة كانوا يرسلولنا الجزئيات المهمة فيه ودا كان يهوّن علينا كتييير وموجودة عروض لكل الوحدات ، فالحمدلله ميسرينها على الطُلاب مرا.

٣- الكويزات الورقية مرا مهمة ومنجد يجي منها فالإختبار كتير، فلازم تدرسوها كويس كمراجعة بعد ما تخلصوا خلاص.

٤- برضو الأسسمنت نفس الشي زي الكيمياء والفيزياء ، مهم مرا.

٥- ولو حسيتوا نفسكم منكم فاهمين جزئية أسألوا دكاترتكم ولو برضو ما وصلت تقدروا تدخلوا على قناة السنة التحضيرية فيه برضو مراجعات لكل الفصول وتقدروا كمان فيديوهات فالنت مليان وبالعكس تقوّي لغتكم الأنقليزية، فيعني فكل الحالات مافي عذر أنو ما نذاكر كويس ونفهم ونخلص فعلمنا.

وبإذن الله فالنهاية حتلاقوا نفسكم ماخدين الـ ٥ وأنتوا مرتاحين.

*الرياضيات :

طبعاً الرياضيات وكلام الطُلاب عليه من صعوبتو وأن الأسئلة فجهة والمنهج فجهة تانية وأنو محد يقدر يجيب فيه ٥ إلا الدوافير الي مرا !

الرياضيات مهو صعب زي ما بيقولوا عليه، الرياضيات زي أي علم بنتعلّموا صحيح تفاصيلو كتير وتمارينو أكتر وفيه حوسة لكنو مهو صعب، مهو مستحيل ! 

مافي شي مستحيل .. دي الكلمة البشر أخترعوها عذر لهم بوقت يأسهم وعشان مايبغوا يسوا شي ويتعبوا!

وعشان نعدّي فيه وبأعلى الدرجات لازم نضاعف الجهود ونزاكر كل يوم ، خصصوا من يومكم ساعتين أو ساعة ونص لمذاكرة الرياضيات من يوم ما تبدأوا ، أستغلوا كل الدروس ولا تخلوا شي عشان الدرس إلي ما يتزاكر على طول والله العظيم يتراكم ويخش مع دروس كتير، ما بخوفكم لكن بحطكم فالصورة عشان تكونوا على بيّنة وعلم من البداية وما يصدمكم الوضع.

وعشان كدا فالرياضيات لازم نعمل : 

١- التركيز فالمحاضرة خطوة بخطوة مع دكاترتكم، كل تفصيلة صغيرة وكبيرة.. محاضرة الرياضيات دي لازم تتهيأولها نفسياً وعقلياً وجسدياً كمان، كل حواسكم لازم تكون شغّالة فالمحاضرة .. أسألوا عن خطوات المعادلة لاتسكتوا عن شي ما تعرفوه.

٢- تخصيص وقت فاليوم والمذاكرة أول بأول يومياً لها فضل كبير بعد توفيق الله بأنو تحصدوا أعلى الدرجات.

٣- فيه موقع أسمو "زُهري" حيعطوكم هوا الدكاترة ، برضو لازم قبل ما تاخدوا إي وحدة تطبعوا تمارينها والميني تست حقها وتزاكروها بعد كل محاضرة لأنو زي ما سمعنا د.زُهري بيحط كتير فأسئلة الإختبار فيعني بتجي منها كتير كتير، وفيه مواقع كتير تطلع نتيجة حل المسائل أو أسألوا دكاترتكم على الجواب الصحيح، لأنو أش فايدة الحل بدون الجواب الصح ! 

٤- برضو الأسسمنت زي المواد العلمية الباقية مهم جداً للرياضيات وبيعطيكم أفكار كتير لأسئلة الإختبار ، فلا تهملوه .. صحيح حتتعبوا فيه؟

 بس حاولوا وأنتوا بتدرسوا تتحتسبوا الأجر وما تيأسوا من إي كلمة سلبية تسمعوها عن الرياضيات وعن صعوبتو وأنو مادة غثيثة، سكوا أدنكم وكملو وأعرفوا أنو فدي الدنيا مافي شي يضيع كدا، أدرسوه بحب وشغف عشان تقدروا تنجزوا فيه وتعدّوه وأنتوا متطمنين.. 

الرياضيات تحدي ياتكسبوه وتجيبوا فيه أعلى الدرجات يا تخلوه يتغلّب عليكم .. وأنا عارفة أنو طُلاب طيبة الطيّبة قدّها وقدود إن شاءالله وحيعدوا دي المرحلة بنجاح !

وكدا بإذنو لو سويتوا الي عليكم حتشوفوا نتيجة دا التعب وبقدرة الكريم تجيبوا الـ ٥ بجدارة. 

*الإنجليزي:

طبعاً دي المادة حبّابة وسهلة وخفيفة على القلب جداً رغم ساعاتها الكتير إلا أنو تقدروا تحصّلوا فيها درجات بإذن الله والي ما لحّق يأسس نفسو فالإجازة حيستفيد منها مرا وحتتحسّن لغتو .. لكن نصيحتي لكم بدان فيه وقت لسّا على الدوامات أستغلّوه .. لو نص ساعة كل يوم تتعلموا شي جديد حينفعكم ويسير الأنقلش بالنسبالكم مويا.. لأنو منجد حرام معدّلكم ينزل بسبب دي المادة وعلى فكرة وحداتها كتير فيعني جزء كبير من المعدّل بيعتمد عليها .. مابقولكم كدا عشان تخافوا بس عشان تكونوا فالصورة لين ما يجي وقتها .. فأنتبهوا الله يسعدكم !

وبرضو أساتذتها غالبيتهم أجانب فدا شي مرا حيساعدكم تنطلقوا فاللغة .. الإختبار التجريبي ففأول أسبوع فدراسة لدي المادة حيحدد مستواكم .. لو كان عادي أو هاي لفل ، فعشان كدا مرا مهم تحضروه ولاتقولوا أنو مهم بالعكس.. بدنكم شاطرين فالأنقلش خسارة يضيع عليكم الهاي لفل !

وطبعاً يفرقوا المستويين عن بعض فعدد ساعات الدوام والغياب .. فالعادي ٤ ساعات يومياً والهاي ليفل ممكن ساعتين فاليوم وغيابات الهاي ليفل أقل أما المستوى العادي أكتر وحيدرسوا نفس الكُتب والمستويات كلهم حيبدأوا من الصفر لكن طريقة التدريس والأساتذة حيختلفوا كتير .. وطبعاً حتدرسوا إن شاءالله ٣ مستويات .. وكل مستوى فيه كتابين:-

١-ريدنق ورايتنق.

٢- لسسنق وسبيكنق.

وكل كتاب فيه ١٠ وحدات .. يعني كورس مُكثّف !

ومجمل الكُتب الي حتدرسوها٦ كُتب فكل السنة التحضيريّة .. والجزئية الي حتختبروها فالدوري حتنحذف فالفاينل .. فدا شي مرا كويس !

وعشان تمشوا فالإنجليزي لازم تعملوا:

١-التركيز في المحاضرة وأنكم تسألوا عن معاني الكلمات الي ماتعرفوا عنها وعن إي شي تاني .. وحاولوا أنكم ما تتخطوا شي فالإنقلش عشان منجد دي المادة بحر .. *الحضور؟

صحيح ساعات الغياب مرا طويلة ممكن تجي ٤٨ ساعة للمستوى العادي ، لكن برضو لاتغيبوا إلا فالشديد القوي لأنو دا الإنقلش كورس وبيطوّر لغتكم مرا.

٢- أدخلوا على "أكسفورد أون لاين ".. طبعاً دا شي إضافي مافي عليه درجات لكن مرا حلو فيه تمارين كتير على كل وحدة فالكتابين .. حتلاقوا الكود ورا الكتاب وكمان الرابط وممكن برضو تجي أسألتوا فالإختبار فأنتبهوا.

٣- التمارين الإلكترونية حيرسلولكم هيا أساتذتكم بعد كل فترة على رابط مهم وعليه درجات، أسألتو مهمة حاولوا تحلوها بتركيز عشان ممكن تجي فالإختبار.

٤- الإختبار الكتابي وحيكون خاص فكتاب الريدنق والرايتنق : أستعدوا كويس  وأكتبوا البرقرافات أول بأول  من يوم ما تخلصوا الوحدة .. وحاولوا تكتبوها بنفسكم ماتاخدوها من النت عشان دا الشي يساعدكم تتذكروا وتسهل دراستها عليكم.

٥- حاولوا تراجعوا الأسئلة فكتاب اللسننق والسبيكنق عشان برضو ما تتشتتوا فإختبار السبيكنق وتكونوا عارفين كل شي .

وبإذن الله أول بأول .. حتجيبوا الـ٥ فالأنقلش بالراحة.

        ************************

#الإختبارات وكيف طريقتها؟

١- الإختبارات كلها إلكترونية في كل المواد .. للإختبار القصير والدوري وكمان النهائي ما عدا الكتابي فمادة الإنجليزي.. ولاتخافوا النظام سهل وحلو وحيساعدكم إن شاءالله .. فيُفضّل تختبروا أول أسبوع الإختبارات التجريبيّة عشان تتعرفوا عليها.. 

والشي الحلو والي يطمّن أنو فيه فرصة كمان لو ماجبتوا درجة كويسة فأي إختبار حتعوضوه بالـ " التحسين"بإذن الله.. يشمل كل المواد معدا إختبار الكتابي والمحادثة لمادة الإنجليزي.

٢- مادة .. الفيزياء+الكيمياء+ الأحياء + الرياضيات+اللغة العربية+الدراسات الإسلامية.. حيكون فيها إختبار قصير ودوري وكمان نهائي.

٣- مادة المهارات الجامعيّة .. إختبار واحد دوري بس  وكمان نهائي ؛ عشان الفعاليّة الي حتعملوها فمحا يكون فيه إختبار قصير. 

٤- مادة الإنجليزي برضو إختبار دوري ونهائي بس. 

٥- إختبار الكتابي في مادة الإنجليزي.. طبعاً هوا إختبارين وكلها سهلة وخفيقة ورح يحددوا كل المواضيع فيعني لا تشيلوا هم وحضرولو كويس.

٦- إختبار المحادثة في مادة الإنجليزي.. برضو إختباراين ، ولو كنتوا خطوة بخطوة فالكتاب ومع أساتذتكم تجيبوا٥ إن شاءالله بسهولة..لأنو بسيط ومايحتجلو.

٧- التحسيــن؟

*سؤال :

طيب مثلاً لو أختبرت فمادة الرياضيات وجبت درجة مهي كويسة فالدوري.. هل عندي فرصة قبل النهائي أحسّن؟

*الجواب : 

إيوه طبعاً بفضل من الله فيه فرصة فأبداً لا تفقدوا الأمل !

التحسين لكل المواد لكن حتكون داخلة فيه جزئية الإختبار القصير والدوري.. صحيح الجزئية طويلة لكن بإذن الله سهلة وكلها مجرد أنو تراجعوها وتركّزوا على الحاجات الي غلطتوا فيها ..

طبعاً طريقة  الدرجات تختلف: 

•الدراسات الإسلامية،اللغة العربية، الأحياء ، الرياضيات، الكيمياء، الفيزياء.. حيكونوا من ٥٠ درجة "مجموع درجة الإختبار القصير والدوري".. بـ٣٠ سؤال.

•الإنجليزي، المهارات الجامعيّة.. إختبار من٣٠ درجة زي درجة الدوري. 

حابة أنبّهكم على شي مهم مرا؟

لو حتفكروا تدخلوا التحسين لازم لازم لازم  تنتبهوا عشان حيكون قبل الإختبارات النهائية فتحتاجوا تنظّموا وقتكم كويس مراا .. مابين التحضير للنهائي والإستعداد للتحسين .. وبإذن الله ، ربّي ما يحوجكم له.

*طبعاً دي الصورتين .. جدول الإختبارات القصيرة والدوريّة ومعاهم التحسين والنهائي :

       

أوقات الإختبارات قريبة جداً من بعض زي ما أنتوا شايفين فالصور .. 

تراكموا كل شي لوقت الإختبار محا يكون من صالحكم أبداً أبداً .. ركّزوا لدي النقطة كويس وخلّوها فبالكم على طول . 

                       ********************

حقولكم كمان على حاجة تحمّس !

 فنهاية الفصل الدراسي التاني إن شاءالله حيكون فيه نشاط إسمو " جرّب نفسك" .. فكرة دا البرنامج أنو يعرفوكمعلى التخصصات الي ما بعد التحضيري بالتفصيل ويكون التسجيل فيه للسبّاقين.. مرا مرا كان جميل وأعطانا طاقة أنو نكمّل لأنو خلاص فنهاية التحضيري تعبنا مرا بسبب الضغط النفسي، لكن دا الشي رجّع فينا الحماس لمن شفنا وعرفنا كل التفاصيل عن التخصص الي نبغاه إن شاءالله .. 

•ودي مقتطفات من زيارة مبنى كلية الطب البشري والتمريض:

طبعاً ورونا كل شي حتى المشرحة والجثث بس عشان الأمانة العلمية مستحيل نصورها .. أنبسطنا فداك اليوم الحمدلله كتير وكان يوم مستحيل ننساه !

        ********************

التحضيري سهل!

التحضيري حلو!

وأنكم تجيبوا ٥ مو صعب أبداً .. كلكم تقدروا وكلّكم قدّها .. وطول ما أنتوا مؤمنين أنكم تقدروا حتقدروا وتكمّلوا !

التحضيري ما يبغالو شي إلا أنكم تقسّموا وقتكم وتعقدوا نيتكم قبل كل شي .. التحضيري مهو معجزة ولاشي مستحيل .. لكن يبغالو شويّة مفاتيح لو عرفتوها حتمشوا فيه وتبدعوا كمان ..

 دا العلم الي بتاخدوه بيرفعكم إن شاءالله ويعلّي قدركم عند الله ، عشان تنفعوا نفسكم ووطنكم وأمتكم !

دا العلم الي حتدرسوه أمانة من عند الله، عشان كدا لازم تِحسنوا فأبسط التفاصيل!

وكل يوم وأنتوا ماشيين للدوام ولا رايحين للمبنى أفتكروا هدفكم الي بتسعوا عشانو!

أفتكروا أنو ربّنا دايماً معاكم ومحوّطكم برحمتو ولطفو ومستحيل يترككم.. أفتكروا كيف  شعوركم وأنتوا محقيين الهدف .. فرحة أهلكم بيكم  !

حتى لو تعبتوا مرا وحسيتوا بضغط .. ترا كل دا فوسعكم، طمّنوا قلوبكم أنو:

 ﴿ لايُكلف اللهُ نفساً إلاوسعَها﴾

وفدا الرابط حتلاقوا إن شاءالله .. العروض والحاجات المهمة للمواد العلمية والعامة لكل الخطتين:

https://drive.google.com/drive/folders/0Bxvd1QUo2E1DMjhtX2VNUG9wNzQ

وبكدا خلّصت حكاية السنة التحضيريّة .. 

أتمنى تكونوا أستفدتوا من كل الكلام الي أنكتب.. وإن شاءالله ربّي يفتح عليكم ويكتبلكم الخير ونشوفكم محقيين أهدافكم يارب..

ومنجد أعتذر لو طوّلت عليكم وخليتكم تمّلوا من الكلام .. لكن حقيقةً حسيتها أمانة ولازم أوصّلكم هيا على أكمل وجه وبكل التفاصيل.

ولو أحتجتوا إي شي فالدراسة أو عندكم إي سؤال حكون بإذن الله موجودة ودا حسابي على التويتر..

‏ "oxd111@"

لاتنسوني من صالح دعواتكم يا أصدقاء .. أختكم شيماء